Eurochild 2026 համաժողովի շրջանակում մասնակցեցինք Concordia International-ի աշխատարանին, որի ընթացքում ներկայացվեց երեխաների պաշտպանության, ընտանիքների աջակցության և երիտասարդների անկախ կյանքի պատրաստման Concordia մոդելը։                                                                                                                                                                                                                   

Աշխատարանի ամենահիշվող հատվածը Concordia-ի նախկին շահառու Բոգոմիլայի պատմությունն էր, որը ցույց տվեց, թե որքան մեծ ազդեցություն կարող են ունենալ ժամանակին տրամադրված աջակցությունն ու երեխայի ներուժի նկատմամբ հավատը։                                                                                                                                                                                                                                   

Բոգոմիլան մեծացել էր մեկուսացված միջավայրում, չէր հաճախել դպրոց և գրեթե շփում չէր ունեցել արտաքին աշխարհի հետ։ 13 տարեկանում, ծնողների ազատազրկումից հետո, նա և քույրը տեղափոխվել էին ճգնաժամային կենտրոն։ Այդ ժամանակ, ինչպես ինքն է պատմում, ոչ ոք չէր բացատրել, թե ինչ է կատարվում իր հետ, ինչ իրավունքներ ունի կամ ինչ որոշումներ են կայացվում իր կյանքի վերաբերյալ։                                                                                                                                                                                                              

Այս փորձառությունը դարձավ աշխատարանի կարևոր քննարկման թեմաներից մեկը։ Մասնակիցները համաձայն էին, որ երեխաները պետք է տեղեկացված լինեն իրենց կյանքի վերաբերյալ կայացվող որոշումների մասին և հնարավորություն ունենան մասնակցելու այդ գործընթացներին։                                                                                                                                                                                

Չնայած բազմաթիվ դժվարություններին՝ Բոգոմիլան կարողացել է լրացնել կրթական բացերը, հաջողությամբ ավարտել դպրոցը և այսօր սովորում է համակարգչային գիտություններ։ Նրա պատմությունը դարձավ հիշեցում, որ երեխայի ապագան չպետք է որոշվի միայն նրա կյանքի մեկնարկային պայմաններով։                                                                                                                                                         

Աշխատարանի ընթացքում ներկայացվեց նաև Concordia-ի բազմամասնագիտական աշխատանքի մոդելը, որտեղ սոցիալական աշխատողները, հոգեբանները, բուժքույրերը, առողջապահական միջնորդները և այլ մասնագետներ համատեղ աշխատում են երեխաների և ընտանիքների հետ՝ կանխելու ընտանիքից բաժանումը և ապահովելու երեխայի բնականոն զարգացումը։

Հատուկ ուշադրություն դարձվեց ազդեցության գնահատման համակարգին (CIMS), որի միջոցով կազմակերպությունը գնահատում է երեխաների բարեկեցությունը, կրթական առաջընթացը, ինքնուրույն կյանքի պատրաստվածությունը և ծառայությունների արդյունավետությունը։ Ներկայացված տվյալների համաձայն՝ հարցված երեխաների 94%-ը գնահատել է իր բարեկեցությունը որպես լավ, իսկ 98%-ը հաջողությամբ ավարտել է ուսումնական տարին կամ կրթական փուլը։                                       

Քննարկման ընթացքում բազմիցս ընդգծվեց, որ երեխաների պաշտպանության համակարգը պետք է հիմնված լինի.

վաղ կանխարգելման,

երեխաների մասնակցության,

իրավունքահեն մոտեցման,

բազմամասնագիտական աշխատանքի,

երկարաժամկետ հոգեբանական և սոցիալական աջակցության,

և կայուն պետական ֆինանսավորման վրա։                                                                                                                                                           

Բոգոմիլայի եզրափակիչ խոսքը դարձավ ամբողջ աշխատարանի ամենաուժեղ ուղերձը.

«Փորձեք տեսնել լավը յուրաքանչյուր երեխայի մեջ»։

Այս միտքը հիշեցնում է, որ յուրաքանչյուր երեխա, անկախ իր անցած ճանապարհից, ունի ներուժ զարգանալու և հաջողելու, եթե նրա կողքին լինեն մարդիկ և համակարգեր, որոնք կհավատան նրան և կաջակցեն։