Մասնակցեցինք քննարկման, որի ընթացքում ներկայացվեց երեխաների իրավունքների և բարեկեցության խթանմանն ուղղված բիզնեսների հավաստագրման մոդելը, որն արդեն կիրառվում է Բուլղարիայում և ներդրման փուլում է Կոսովոյում։

Նախաձեռնության նպատակն է աջակցել բիզնեսներին դառնալու ավելի պատասխանատու գործատուներ, զարգացնելու ընտանիքամետ քաղաքականություններ և նպաստելու երեխաների իրավունքների պաշտպանությանն ինչպես աշխատավայրում, այնպես էլ համայնքներում։

Քննարկման ընթացքում ներկայացվեցին գնահատման հիմնական ուղղությունները, որոնք ներառում են․

 աշխատակիցների բարեկեցություն և աշխատանքի ու անձնական կյանքի հավասարակշռություն,

 հղի և կրծքով կերակրող կանանց աջակցություն,

որդեգրող և խնամատար ծնողների նկատմամբ քաղաքականություններ,

 երեխաների իրավունքներ 

 գենդերային հավասարություն և սեռական ոտնձգությունների կանխարգելում,

 մանկական աշխատանքի բացառման և պատասխանատու մատակարարման շղթաների ապահովման մեխանիզմներ։

Հատկանշական էր այն մոտեցումը, որ գործընթացը հիմնված չէ «սխալներ հայտնաբերելու» տրամաբանության վրա։ Այն դիտարկվում է որպես զարգացման և շարունակական բարելավման գործիք, որի միջոցով բիզնեսները կարող են գնահատել իրենց ազդեցությունը երեխաների, ընտանիքների և համայնքների վրա։

Քննարկման կարևոր ուղերձներից մեկն այն էր, որ երեխաների իրավունքների պաշտպանությունը միայն պետական կառույցների կամ հասարակական կազմակերպությունների պատասխանատվությունը չէ։ Բիզնեսները նույնպես կարևոր դերակատարներ են երեխաների համար անվտանգ, ներառական և բարենպաստ միջավայր ստեղծելու գործում։

Նախաձեռնությունը ներկայացվեց որպես համագործակցության հաջողված օրինակ, որտեղ շահում են բիզնեսները, աշխատակիցները, ընտանիքները, համայնքները և երեխաները։